Concurso de Novas Ideas Empresariais

4º Solicitudes e documentación

Os interesados inscribiranse no Concurso mediante instancia dirixida á Oficina de Promoción Económica que presentarán no Rexistro Xeral do Concello ou a través de calquera dos medios previstos no artigo 38.4 da Lei 30/92 de Réxime xurídico das Administracións Públicas e Procedemento Administrativo Común.

Deberán presentar unha instancia por cada unha das modalidades do concurso as que se presenten, tendo en conta que as mulleres e titulados en formación profesional poderán acceder tanto á edición xeral como ás súas específicas. Non obstante bastará con que a documentación a achegar coa solicitude sexa única e figure anexa a unha soa das instancias.

A documentación a presentar, por duplicado, sendo unha delas orixinal ou fotocopia compulsada é a seguinte:

Un plano de empresa asinado por técnico competente no que se explique a viabilidade do novo proxecto, detallando os aspectos técnicos de produción e comercialización, investimentos e financiamento, conta de resultados, etc…
Certificacións de estar ao corrente nas súas obrigas tributarias (Estado e Comunidade Autónoma), Seguridade Social e Concello de Santiago.
Declaración xurada do solicitante de non ter iniciada a actividade empresarial.
Declaración de tódalas axudas e subvencións solicitadas ou obtidas por calquera outra administración pública ou ente público ou privado, nacional ou internacional, así como concursos presentados ou que teña pensado presentarse, premios obtidos, etc…
No caso de ter iniciado o proceso de constitución, copia da escritura de constitución. De non ser así, compromiso mediante declaración xurada de constituír a empresa conforme o disposto na base 8º das presentes bases.
No caso de concorrer á convocatoria para titulados en formación profesional de grao medio ou superior, copia compulsada do titulo correspondente.
Calquera outro dato que se considere de interese de cara a avaliar o proxecto empresarial.