Concurso de Novas Ideas Empresariais

O Concurso de Novas Ideas Empresariais ten coma obxectivo estimular e apoiar ás persoas que teñen unha idea de negocio facilitándolles a posta en marcha do seu proxecto empresarial. O concurso establece tres modalidades diferentes:

Novas Ideas empresariais edición xeral destinada a todas as persoas emprendedoras,
Novas Ideas empresariais promovidas por mulleres, que ten o obxectivo de fomentar a cultura emprendedora entre o colectivo feminino, e a de
Novas Ideas Empresariais promovidas por titulados en Formación Profesional, que nace este ano e ten por obxectivo promocionar o emprendemento entre a xente moza que cursou Formación Profesional.

Cada liña do Concurso conta con tres premios en metálico. O primeiro recibirá 5.000 euros, o segundo 4.000 euros e o terceiro 3.000 euros. No concurso poden participar as persoas físicas ou xurídicas que teñan un proxecto empresarial que no momento de presentar a solicitude non tivese iniciado a súa actividade.

O prazo de presentación de solicitudes remata o 14 de xullo. As bases do Concurso poden consultarse nesta web. A documentación presentarase no Rexistro Xeral do Concello de Santiago (Rúa Presidente Salvador Allende, 4- Santiago) acompañada de instancia dirixida á Oficina de Promoción Económica.

A valoración dos proxectos realizarase por unha comisión de expertos en base aos seguintes criterios: que a persoa física ou membros da sociedade proveñan dunha situación de desemprego, que estea/n censados no Concello de Santiago, que a actividade empresarial a desenvolver se enmarque nos sectores de novas tecnoloxías da información e a comunicación, servizos medioambientais, servizos culturais e de lecer, servizos á comunidade, sectores emerxentes ou novos filóns de emprego.

Tamén se valorará a utilización de recursos da zona, o emprego xerado, as mulleres contratadas, a contribución á inserción de colectivos en situación desfavorable para a integración sociolaboral ou en situación de risco ou exclusión social.